कुस्ती हा महाराष्ट्रातील अस्सल मातीतला रांगडा खेळ. झी टॉकीजच्या विद्यमाने महाराष्ट्रातील मातीतल्या या खेळाला प्रोत्साहन देण्यासाठी खास ‘झी महाराष्ट्र कुस्ती लीग'चे आयोजन करण्यात आले आहे. या लीगचा थरार 2 नोव्हेंबर ते 18 नोव्हेंबर या कालवधीत पुण्याच्या बालेवाडीत रंगणार आहे. ‘झी महाराष्ट्र कुस्ती लीग' च्या निमित्ताने महाराष्ट्रातील नावाजलेल्या कुस्तीगिरांना राष्ट्रीय आणि आंतरराष्ट्रीय कुस्तीगिरांशी लढताना बघण्याची पर्वणी झी टॉकीजच्या प्रेक्षकांना मिळणार आहे. या बहुचर्चित ‘झी महाराष्ट्र कुस्ती लीग’ बरोबर सुरवातीपासूनच महाराष्ट्रातील वेगवेगळ्या क्षेत्रातील दिग्गज नावे जोडली जात आहेत. त्यातीलचं एक महत्वाचे नाव म्हणजे दिग्दर्शक नागराज मंजुळे.

नागराज मंजुळे हे केवळ दिग्दर्शक; नसून लेखक, कवी आणि अभिनेतेही आहेत. आपल्या प्रत्येक कलाकृतीतून संवेदनशीलतेची जाणीव करून देणारे दिग्दर्शक नागराज मंजुळे  महाराष्ट्रातल्या खेळाबाबतही तितकेच सजग आहेत. पिस्तुल्या, फँड्री व सैराट यासारख्या सिनेमांमधून आपले सामाजिक भान दाखवून देणारे दिग्दर्शक नागराज मंजुळे आता झी टॉकीजसाठी ‘झी महाराष्ट्र कुस्तीलीग’चा प्रोमो दिग्दर्शित करणार आहेत आणि मुख्य म्हणजे यात त्यांच्या अभिनयाची झलक  पुन्हा पाहायला मिळणार आहे. सैराटच्या अफाट यशानंतर प्रेक्षकांच्या नागराज मंजुळेंकडून अपेक्षा आणखी उंचावल्या आहेत आणि नागराज यांच्या आगामी प्रोजेक्टची खुपच उत्सुकता आहे. पण प्रेक्षकांची ही इच्छा आता ‘झी महाराष्ट्र कुस्ती लीग ’मुळे पूर्ण होणार आहे.

उत्कंठा हा कुस्ती या खेळाचा श्वास आहे. पैलवानांनी शड्डू ठोकल्यापासून चितपट करण्याच्या शेवटच्या क्षणापर्यंत वाढणारी ही उत्कंठा ‘झी महाराष्ट्र कुस्ती लीग’मुळेआता साऱ्या महाराष्ट्राला लागून राहिली आहे.नागराज मंजुळे ‘झीमहाराष्ट्र कुस्ती लीग’ चा हा थरार प्रोमोच्या माध्यमातून प्रेक्षकांपर्यंत पोहचवणार आहेत.

या प्रोमोबद्दल नागराज मंजुळे यांनी सांगितले की," क्षणाक्षणाला उत्कंठा वाढवणारा कुस्ती हा खेळ पाहण्याची मजा काही औरच असते. ‘झी महाराष्ट्र कुस्तीलीग’शी संलग्न होऊन त्याचा प्रोमो दिग्दर्शित करताना मला खरंच खूप आनंद होत आहे. माझ्या कामावर आजवर प्रेक्षकांनी भरपूर प्रेम केलं आहे आणि त्यांना हा प्रोमोसुद्धा आवडेल अशी मी आशा व्यक्त करतो "

झी टॉकीज व झी युवाचे बिझनेस हेड बवेश जानवलेकर यांनी सांगितलं, “’नागराज मंजुळे यांनी स्वतःला एक उत्तम दिग्दर्शक म्हणून सिद्ध केलं आहे. कुठल्याही एका पठडीत न अडकता, वेगवेगळ्या पद्धतीचे दिग्दर्शन करणेही त्यांची खासियत आहे.'झी महाराष्ट कुस्ती लीग'चे प्रोमो दिग्दर्शित करणे हा त्यातलाच एक भाग आहे. नागराज यांनी 'झी महाराष्ट कुस्ती लीग' साठी योगदान देणे ही झी टॉकीज आणि प्रेक्षकांसाठी भाग्याची गोष्ट आहे.”