डॉक्टर्स म्हणजे देवमाणसं... त्यांना क्षणोक्षणी सलाम करावा असं त्यांचं कार्य.‘डॉक्टर जणू देवाचं दुसरं रूपच’, असं अनेकांनी कित्येक वेळा म्हटलंय, पण यंदाच्या वर्षी ते अक्षरश: अनुभवलं आहे. २०२० मध्ये डॉक्टरांनी जी कमालीची सेवा केली, त्यांचं कौतुक शब्दांत मांडावं तितकं कमीच. ‘डॉक्टर हे आजचे सुपरहिरोज आहेत’ आणि हे प्रेक्षकांसह सोनी मराठी वाहिनीनंही अभिमानानं सांगितलं आहे. डॉक्टरकी करायला, लोकांची सेवा करायला जिगर लागते आणि असेच काही जिगरबाज डॉक्टर्स सोनी मराठीच्या माध्यमातून तुमच्या भेटीला आले आहेत.
एका हॉस्पिटलची संघर्षगाथा मांडणारी ‘जिगरबाज’ ही मालिका प्रेक्षकांचं मनोरंजन करायला सज्ज झाली आहे. सत्तेच्या तुफानाला सत्याचं आव्हान देणार्या जिगरबाज डॉक्टरांची ही गोष्ट आहे. डॉ. अमोल कोल्हे यांच्या जगदंब क्रिएशन्सची निर्मिती असलेल्या या मालिकेत अरुण नलावडे, पल्लवी पाटील, अमृता पवार, श्रेयस राजे, विजय पाटील यांच्या मुख्य भूमिका आहेत. जगदंब क्रिएशन्सनं यापूर्वी ऐतिहासिक मालिकांची निर्मिती केली आहे, पण या नव्या मालिकेच्या निमित्तानी त्यांनी एक वेगळी गोष्ट, वेगळा जॉनर निवडला आहे. विशेष म्हणजे डॉ. अमोल कोल्हे हे स्वत: डॉक्टर आहेत त्यामुळे डॉक्टरांच्या जीवनावर आधारित गोष्ट मांडण्याची त्यांची कल्पना खरंच छान आहे.
कथा, दिग्दर्शन, अभिनय यांसह या मालिकेची जमेची बाजू म्हणजे मालिकेचा सेट. ‘लोक-आधार रुग्णालय’ नावाचं हॉस्पिटल या मालिकेत दाखवण्यात आलं आहे आणि हॉस्पिटलचा पूर्ण सेट हा फिल्म सिटीमध्ये उभारला आहे. हा सेट उभारण्यामागे कला दिग्दर्शक नितीन कुलकर्णी आणि प्रतीक रेडीज यांची मेहनत आहे. अप्रतिम सेट तयार करून, चित्रीकरणाला खरंखुरं रूप देण्यासाठी जिगर लागते आणि ते दोघंही जिगरबाज आहेत, असं म्हटलं तरी हरकत नाही.
तुम्हीही अनुभवा जिगरबाज डॉक्टरांची गोष्ट ‘जिगरबाज’ मालिकेत, सोमवार ते शनिवार रात्री १० वाजता, फक्त सोनी मराठीवर.