लॉकाडाउनच्या काळात अनेकांनी मिळालेल्या वेळेचा सदुपयोग केला . काहींनी आपले छंद जोपासले तर काहींनी नव्या गोष्टी शिकत आपल्या कारकिर्दीसाठी त्याचा उपयोग केला . अभिनेत्री संस्कृती बालगुडेसुध्दा तिची चित्रकलेची आवड जोपासताना दिसते आहे. सोशल मिडीयावर सतत सक्रीय असणा-या संस्कृतीने नुकतंच तिच्या नव्या वॉल पेंटिंगचा व्हिडीओ चाहत्यांशी शेअर केला आहे.
संस्कृतीला चित्रकलेची प्रचंड आवड आहे. हीच आवड ती अनेकदा आपल्या विविध कलाकृतींमधून चाहत्यांसमोर सादर करते. मागच्या वेळेस संस्कृतीने भितींवर प्रसिध्द हॉलिवूड अभिनेत्री मर्लिन मन्रो साकारली होती. पण यावेळेस तिने सौंदर्याची खाण असलेल्या बॉलिवूड अभिनेत्री मधुबाला यांचं वॉल पेंटिंग रेखाटलं. संस्कृतीच्या या सुंदर पेंटिंगवर चाहत्यांनी लाईक्स आणि कॉमेंट्सचा वर्षाव करत तिच्या कलेचं कौतुक केलं आहे.
मधुबाला संस्कृतीची खुप आवडती अभिनेत्री आहे. तिच्यावरचं प्रेम तिने या पेंटींगमधून व्यक्त केलं आहे. संस्कृतीचं हे वॉल पेटींग तुम्हालाही नक्कीच आवडेल, यात तिने विविध रंगाचा सुरेख वापर करत या प्रसिद्द अभिनेत्रीला मानवंदना दिली आहे.
