‘समांतर’ ही वेब सीरिज प्रचंड लोकप्रिय ठरली. या वेब सीरिजचे खिळवून ठेवणारे कथानक आणि हळूवारपणे उलगडत जाणारे रहस्य प्रेक्षकांच्या पसंतीस उतरले. या वेब सीरिजच्या पहिल्या सिझननंतर प्रेक्षक दुसऱ्या सिझनची आतुरतेने वाट पाहत होते. आता लवकरच या सीरिजचा दुसरा सिझन प्रेक्षकांच्या भेटीला येणार आहे. स्वप्निल जोशी, तेजस्विनी पंडीत यांच्यासोबतच नितिश भारद्वाज यांचीसुध्दा ह्या पहिल्या सीझनमध्ये प्रमुख भूमिका होती.
कुमार महाजनच्या आयुष्यात येणार ती बाई कोण, याकडे आता सर्वांचं लक्ष लागलं आहे आणि इथूनच दुस-या सीझनची सुरुवात होणार आहे. कुमार महाजनची पत्नी निमा साकारणारी अभिनेत्री तेजस्विनी पंडीतने ‘समांतर २’मधले कुमार व निमाचे सेटवरचे फोटो चाहत्यांशी शेअर केले आहेत. त्यामुळे वेबसिरीजबद्दल उत्सुकता आणखी वाढलीय.
‘समांतर २’ ही वेब सीरिज १ जुलै रोजी प्रेक्षकांच्या भेटीला येणार आहे. सीरिजमध्ये स्वप्नील जोशी, तेजस्वीनी पंडीत, नीतीश भारद्वाज यांच्यासोबतच दुस-या सीझनमध्ये सई ताम्हणकरची एन्ट्री होणार आहे. ही १० भागांची सीरिज मराठीसह हिंदी, तमिळ आणि तेलुगू या भाषेमध्ये प्रदर्शित होणार आहे. प्रेक्षकांना ही सीरिज एमएक्स प्लेअर या ओटीटी प्लॅटफॉर्मवर पाहायला मिळणार आहे.
