अभिनेते, दिग्दर्शक महेश मांजरेकर यांच्या ‘दे धक्का 2’ सिनेमाची प्रेक्षकांना प्रचंड उत्सुकता आहे. मेधा मांजरेकर, मकरंद अनासपुरे, सिध्दार्थ जाधव, सक्षम कुलकर्णी, शिवाजी साटम, गौरी कुलकर्णी, संजय खापरे आदी कलाकारांच्या सदाबहार अभिनयाने या सिनेमाचा पहिला धम्माल भाग प्रचंड गाजला. आता मांजरेकर प्रेक्षकांसमोर काय घेऊन येणार याची आतुरता लागून राहिली असतानाच ‘दे धक्का 2’च्या प्रदर्शनाची तारीख नुकतीच उलगडली आहे.
‘दे धक्का 2’ हा सिनेमा येत्या जानेवारी 2022 रोजी प्रेक्षकांच्या भेटीला येत आहे. या सिनेमाचे निर्माते अमेय खोपकर यांनी आपल्या फेसबुकवरुन सिनेमाच्या रिलीजची तारीख जाहीर केली आहे. ते पोस्टमध्ये लिहतात, "दे धमाल हसवणुकीचा दुसरा डोस. महेश मांजरेकर दिग्दर्शित दे धक्का २ तारीख ठरली!!!१ जानेवारी २०२२ थांबायचं नाय, गड्या थांबायचं नाय, घाबरायचं नाय, गड्या घाबरायचं नाय"
दे धक्काच्या पहिल्या भागातील सर्व प्रमुख कलाकार इंग्लडची राजधानी लंडनमध्ये धम्माल उडवताना दिसतील म्हणूनच प्रेक्षक खुप उत्सुक आहेत. या सिनेमाने प्रेक्षकांच्या मनात एक खास स्थान मिळवलं आहे, त्यामुळे दस-या भागात मनोरंजनाचा दुसरा डोस मिळेल यात शंका नसेल.
