मराठी मनोरंजनविश्वातील प्रसिध्द अभिनेत्री भाग्यश्री मोटे ही गेल्या काही दिवसांपासून सातत्याने चर्चेत आहे. भाग्यश्री आणि तिच्या कुटुंबियांवर दु:खाचा डोंगर कोसळला आहे. भाग्यश्रीची बहीण मधू मार्कंडेय हिचं निधन झालं आहे. बहिणीच्या निधनामुळे तिला धक्का बसला होता. बहिणीच्या निधनाच्या काहीच आठवडे आधी तिच्या भाऊजींचंसुध्दा निधन झालं. आपल्या बहिणीचं निधन हे घातपात असल्याची शक्यता तिने वर्तवली आहे. तिने एक पोस्ट शेअर करत मोठा खुलासा केला असून सर्वांचंच लक्ष तिकडे वेधलं आहे.
भाग्यश्री मोटेची पोस्ट
मी केलेली ही पोस्ट धमक्या देण्यासाठी किंवा लक्ष वेधण्यासाठी नाही. १२ मार्च रोजी रविवारी सकाळी माझी बहीण केक बनवण्याचे सामान आणि दोन तयार केलेले केक बेस घेऊन एका केक वर्कशॉपसाठी निघाली होती. ज्या महिलेकडे ती या वर्कशॉपसाठी जात होती तिला ती फक्त ३ ते ४ महिन्यांपासून ओळखत होती. तिच्याबरोबर काम करत होती. आमच्या माहितीनुसार तिला ५ महिलांबरोबर हे वर्कशॉप घ्यायचे होते.
आता त्याच महिला सांगत आहेत की त्या दोघी खोलीच्या शोधात बाहेर पडल्या होत्या. रस्त्यात एका खोलीसाठी त्यांना बोर्ड लागलेला दिसला. त्यांनी मालकाशी संपर्क केला. त्या ठिकाणी गेल्या, तेव्हा त्यांचे तिथे अर्धा तास संभाषण झाले. त्यावेळी माझी बहीण अचानक खाली पडली. तिला तातडीने खासगी रुग्णालयात नेले. मात्र तिचे पल्स सुरू नव्हते. त्यामुळे खासगी रुग्णालयाने तिला रुग्णालयात दाखल करुन घेण्यास नकार दिला. त्यानंतर जेव्हा तिला वायसीएम रुग्णालयात नेले, तेव्हा तिचा एका तासापूर्वी मृत्यू झाल्याचे डॉक्टरांनी सांगितले.
माझी बहीण सर्व काही ठरवून आणि खात्री करून निश्चित केलेल्या कार्यशाळेसाठी गेली, याचा स्पष्ट पुरावा आहे. एक दिवस आधी तिला त्यासाठी अॅडव्हान्स देखील मिळाला होता. माझ्या बहिणीच्या चेहऱ्यावर नखांच्या खुणा स्पष्ट दिसत होत्या आणि डॉक्टरांनी देखील याची पुष्टी केली होती. हा सर्व प्रकार ज्या पद्धतीने घडला तो पूर्णपणे संशयास्पद होता. त्या ज्या ठिकाणी गेल्या होत्या, ते ठिकाण खूपच कमी रहदारीचे होते. त्या संपूर्ण भागात सीसीटीव्ही नव्हते. माझ्या बहिणीने खोली भाड्याने घेतली होती आणि व्यवसायासाठी तिचे एक ऑफिस होते. आर्थिक मदतीसाठी तिने पहिल्या केक वर्कशॉपची ऑर्डर घेतली होती.
इतके दिवस आणि इतके स्पष्ट पुरावे मिळूनही याप्रकरणी कारवाई का होत नाही, याबद्दल मला शंका आहे. दिशाभूल करणारी आणि चुकीचे माहिती पसरवली जात आहे. मला कोणतीही स्पष्ट उत्तरे मिळत नाहीत. मी माझ्या बहिणीसाठी न्याय मागत आहे.”, अशी पोस्ट भाग्यश्री मोटेने केली आहे.
भाग्यश्रीने बहिणीच्या संश्यास्पद मृत्यूबाबत अनेक प्रश्न उपस्थित केले आहेत.
