राजकारण आणि मनोरंजन ही दोन अशी क्षेत्र आहेत जी नेहमीच झगमगाटात असतात आणि सामान्यांसाठी चर्चेचा विषय ठरतात. तसाही या दोन क्षेत्रांचा एकमेकांसोबत काही संबंध नसतो पण कधी कोणाचं एकमेकांशी काही नातं असू शकतं. नुकतंच ‘द फॉरगॉटन आर्मी’ ही वेबसिरीज प्रदर्शित झाली.
अॅमेझॉनवर प्रदर्शित झालेल्या या वेबसिरीजचं दिग्दर्शन कबीर खानने केलं. यात मराठमोळी शर्वरी वाघ प्रमुख भूमिकेत झळकली. यात तिने विकी कौशलचा भाऊ सनी कौशलसह स्क्रीन शेअर केली.
अभिनेत्री शर्वरी वाघ आणि महाराष्ट्राचे माजी मुख्यमंत्री व ज्येष्ठ शिवसेना नेते मनोहर जोशी यांचं खास नातं आहे. शर्वरी ही मनोहर जोशींची नात आहे. म्हणजेच तिची आई नम्रता वाघ ही मनोहर जोशी यांची लेक आहे.
शर्वरीच्या अभिनयाची आणि तिच्या लुक्सची सध्या इंडस्ट्रीत बरीच चर्चा रंगली. एक होतकरु अभिनेत्री म्हणून सध्या तिच्याकडे पाहिलं जातंय. लवकरच शर्वरी अभिनेता सिध्दांत चतुर्वेदीसह 'बंटी और बबली'च्या सिक्वलमध्ये प्रमुख भूमिकेत झळकतेय.
त्यामुळे सर्वांनाच तिला मोठ्या पडद्यावर पाहण्याची उत्सुकता लागून राहिली आहे.
