आज करोना संकटामुळे सर्वच दैनंदिन कामं ठप्प आहेत फक्त जीवनावश्यक वस्तूंचा पुरवठा तेवढा सुरळीत सुरु आहे. सर्वचजण घरी आहेत. बच्चेकंपनींसाठी मात्र ही उन्हाळ्याचीच सुट्टी असली तरी नेहमीप्रमाणे बाहेर मित्रमंडळींसोबत दंगा घालण्यासारखी सुट्टी नाही. त्यांना घरीच बसून बैठे खेळ खेळून, पुस्तकं वाचून, कधी मोबाईलवर टाईमपास करत घालवायची आहे, शेवटी नाही म्हटलं तरी आई बाबांसाठी हा मोठा टास्कच. पण तुझ्यात जीव रंगला मालिकेतला सर्वांचा लाडका आणि खास करुन राणा दा व पाठकबाईंचा लाडका लाडूने मात्र गिटार शिकायला घेतलीय. त्यामुळे आपोआपच त्याच्या आई बाबांचं टेन्शन गेलं आहे.
लाडूची भूमिका साकारणारा प्रसिध्द बालकलाकार राजवीर हा प्रत्यक्ष आयुष्यातसुध्दा तितकाच चुणचुणीत आहे. त्याच्या इन्स्टाग्राम अकाऊंटवरुन त्याच्या विविध कार्यक्रमांचे , शालेय स्पर्धेतील बक्षिसं मिळवल्याचे फोटो पाहायला मिळतात. तसंच विविध वेषभूषेत तो खुप क्युट दिसतो. सर्व सेलिब्रिटीसुध्दा त्याचे चाहते आहेत.
सध्या क्वारंटाईनमध्ये गच्चीवर विविध पोझेसमध्ये लाडूचे गिटार वाजवतानाचे हे फोटो खुपच भारी आहेत. नेहमीप्रमाणेच चाहत्यांनी त्यावर कौतुकाचा वर्षाव केला आहे. मोठ्यांसारखाच लाडूसुध्दा काही नवीन शिकण्यात आपला हा वेळ सत्कारणी लावतोय, हे खरं.
