प्लॅनेट मराठी आणि अक्षय बर्दापूरकर निर्मित आणि मिलिंद लेले दिग्दर्शित ‘AB आणि CD’ या आगामी मराठी सिनेमाचा मुहुर्त सोहळा नुकताच पार पडला. आणि या सोहळ्याच्या निमित्ताने अमिताभ बच्चन देखील या सिनेमात दिसणार आहेत ही आनंदाची गोष्ट प्रेक्षकांपर्यंत पोहचली.

अमिताभ बच्चन मराठी सिनेमात दिसणार याचा आनंद जितका मराठी प्रेक्षकांना झाला आहे तितकाच आनंद या सिनेमात त्यांच्यासोबत काम करणा-या कलाकारांना देखील झाला आहे. हा आनंद या कलाकारांनी सोशल मिडीयावरुन देखील व्यक्त केला आहे. पण बिग बींसोबत या सिनेमात नेमके कोण दिसणार याची उत्सुकता प्रेक्षकांमध्ये नक्कीच आहे. 

नुकतंच या बहुप्रतिक्षीत सिनेमाचं पोस्टर रिलीज झालं आहे. या पोस्टरमध्ये विक्रम गोखले हे अमिताभ बच्चन स्टाईल पोजमध्ये पाहायला मिळत आहे. विक्रम गोखलेंनी अमिताभ यांनी 'याराना' सिनेमात एका गाण्यात जे लाईटिंगचं जॅकेट घातलं होतं, त्याच पद्धतीचं जॅकेट विक्रम गोखलेंनी परिधान केलं आहे. तसेच या पोस्टरमध्ये अमिताभ सुद्धा दिसत आहे. 

नाटक, मालिका, सिनेमा या तिन्ही माध्यमात उत्तम काम करून आपल्या भूमिकांद्वारे प्रेक्षकांच्या मनावर अधिराज्य गाजवणारे ज्येष्ठ अभिनेते विक्रम गोखले या सिनेमात महत्त्वाच्या भूमिकेत दिसणार आहेत. तर त्यांच्या सोबतीला गेल्या वर्षी ‘आणि डॉ. काशिनाथ घाणेकर’ या सिनेमातून संपूर्ण महाराष्ट्राकडून प्रचंड प्रेम मिळवणारा अभिनेता सुबोध भावे, गोंडस आणि सुंदर अशी अभिनेत्री सायली संजीव आणि अचूक कॉमेडी टायमिंगने प्रत्येकाला हसवणारा अक्षय टंकसाळे पण महत्त्वाची भूमिका साकारणार आहेत.

 या सिनेमात अमिताभजी कॅमिओ रोल साकारणार असून विक्रम गोखले यांच्या मित्राच्या भूमिकेत दिसतील. त्यामुळे अमिताभजी आणि विक्रम गोखले यांच्यातील ऑन स्क्रिन मैत्री पाहायला वेगळीच मजा येणार आहे. या सिनेमाची गोष्ट काय आहे? प्रेक्षकांच्या आवडीचे हे कलाकार नेमक्या कोणत्या भूमिकेत दिसणार ही बाब लवकरच प्रेक्षकांना कळेल.