प्रार्थना बेहरे आणि अनिकेत विश्वासराव ही जोडी पुन्हा एकदा प्रेक्षकांसमोर येतेय. मस्का सिनेमात आपली केमिस्ट्री दाखवल्यानंतर आता आगामी 'अबलख’ या सिनेमाद्वारे परत आपली जादू दाखविण्यासाठी सज्ज झाले आहेत.
स्वप्ने माणसाला जगायला शिकवतात. ही स्वप्ने पूर्ण करण्यासाठी अनेक जण धडपड करत असतात. अशाच स्वप्नांसाठी धडपडणाऱ्या चार मित्रांची कथा अबलख या सिनेमात रेखाटण्यात आली आहे. आनंद शिवाजी चव्हाण दिग्दर्शित या सिनेमात प्रार्थना बेहरे आणि अनिकेत विश्वासराव यांच्या प्रमुख भूमिका आहेत. 'मस्का' सिनेमानंतर अनिकेत आणि प्रार्थनाचा हा दुसरा सिनेमा आहे.
आयुष्य हा एक प्रवास असून या प्रवासाचा आनंद प्रत्येकाला घेता आला पाहिजे. असा संदेश या सिनेमातून देण्यात आला आहे. या प्रवासात येणाऱ्या अडथळ्यांना योग्य प्रकारे तोंड देऊन प्रवास सुखकर कसा करता येईल याकडे लक्ष दिले पाहिजे असेही या सिनेमात मांडण्यात आले आहे. येत्या ऑक्टोबरपासून 'अबलख’ या सिनेमाच्या चित्रीकरणाला सुरुवात होणार आहे.
मैत्री, प्रेम आणि आयुष्यावर आधारलेल्या अनेक संकल्पनांना विविध पद्धतीने मांडणाऱ्या या सिनेमाची निर्मिती श्री तुळजाभवानी प्रसन्न फिल्म्स या बॅनरखाली करण्यात आली आहे.
