यंदाच्या फिल्मफेअर पुरस्कार सोहळ्यात 'रिंगण' या सिनेमाने तब्बल पाच सर्वोत्कृष्ट पुरस्कारांवर आपली मोहोर उमटवली आहे. ज्यात सर्वोत्कृष्ट अभिनेत्याचा क्रिटीक्स अवॉर्ड शशांक शेंडे यांना देण्यात आला असून, साहील जोशीला सर्वोत्कृष्ट बालकलाकाराचा आणि दिग्दर्शकीय पदार्पणासाठी व कथेसाठी मकरंद माने यांना गौरविण्यात आले. तसेच गायक आदर्श शिंदेला सर्वोत्कृष्ट पार्श्वगायकासाठी सन्मानित करण्यात आले.
'रिंगण' सिनेमाला १४ नामांकने जाहीर झाली होती. ज्यामध्ये सर्वोत्कृष्ट चित्रपट (क्रिटिक्स), सर्वोत्कृष्ट सहाय्यक अभिनेत्रीसाठी कल्याणी मुळे, सर्वोत्कृष्ट गीतलेखनासाठी दासू वैद्य आणि वैभव देशमुख, सर्वोत्कृष्ट पार्श्वगायकासाठी अजय गोगावले, सर्वोत्कृष्ट छायाचित्रकारासाठी अभिजीत अब्दे, सर्वोत्कृष्ट संवादासाठी मकरंद माने, सर्वोत्कृष्ट पार्श्वसंगीतासाठी गांधार आणि सर्वोत्कृष्ट ध्वनीमुद्रणसाठी महावीर सब्बनवर यांचा समावेश होता.
राष्ट्रीय तसेच आंतरराष्ट्रीय पुरस्कारास पात्र अशा दर्जेदार सिनेमांची निर्मिती आणि प्रस्तुती करणाऱ्या विधि कासलीवाल यांच्या लॅन्डमार्क फिल्म्सच्या शिरपेचात, आणखीन एक मानाचा तुरा रोवला गेला आहे. कारण, नुकत्याच पार पडलेल्या या पुरस्कार सोहळ्यातील अंतिम नामांकन यादीत लॅन्डमार्कला एकूण १६ नामांकने प्राप्त झाली होती. ज्यात ‘गच्ची’ या सिनेमाच्या २ नामांकनाचादेखील समावेश आहे. 'गच्ची' सिनेमातील सर्वोत्कृष्ट अभिनेत्रीसाठी प्रिया बापटला आणि सर्वोत्कृष्ट ध्वनीमुद्रणसाठी मनोज मोचेमाडकर यांना नामांकन प्राप्त झाले होते.
विविध पुरस्कार सोहळ्यात दर्जेदार कामगिरी करणाऱ्या लॅन्डमार्क फिल्मच्या सिनेमांची मालिका अशीच पुढे कायम राहणार आहे. लॅन्डमार्क अंतर्गत सादर होणाऱ्या या आशयसमृध्द सिनेमांच्या यादीत आता 'नशीबवान' हा सिनेमादेखील नव्याने दाखल झाला आहे. अमोल वसंत गोळे यांचे दिग्दर्शन असलेल्या या सिनेमात भाऊ कदम प्रमुख भूमिकेत आहे. उदय प्रकाश लिखित 'दिल्ली कि दिवार' कथेवर आधारित असलेला हा सिनेमा 11 जानेवारी रोजी प्रेक्षकांच्या भेटीला येणार आहे.
