अभिनेता लोकेश गुप्ते यांच्या दिग्दर्शनातील पदार्पणाचा सिनेमा 'एक सांगायचंय.... UNSAID HARMONY’ या सिनेमाद्वारे बॉलिवूडमधील एक हरहुन्नरी अभिनेता के.के मेनन मराठीत झळकतोय. या सिनेमाचं एक पोस्टर सोशल मिडीयाच्या माध्यमातून उलगडण्यात आलं आहे. के.के मेनन यांच्यासोबतच हिंदीत आपल्या अभिनयाचा ठसा उमटवणारी अभिनेत्री राजेश्वरी सचदेव महत्त्वपूर्ण भूमिकेत आहे.
हे पोस्टर पाहता एकूणच हा सिनेमा एका कुटुंबाची गोष्ट सिनेमात मांडणार असल्याचे समजते. आई-बाबा आणि मुलं या दोन पुढीतलं अंतर आणि त्यांच्यातील हरवलेला संवाद या विषयावर सिनेमाद्वारे प्रकाशझोत टाकण्यात आला आहे.
अभिनेता जितेंद्र जोशीने या सिनेमासाठा खास गीतलेखन केलं आहे. नितीन कुलकर्णी यांचे कला दिग्दर्शन आणि चैत्राली लोकेश गुप्ते यांनी वेशभूषाकार म्हणून काम पाहिले आहे तर ऑस्कर विजेत्या रेसूल पुकुट्टीनं ध्वनी आरेखनाची तर पुष्पांक गावडे यांनी सिनेमॅटोग्राफीची जबाबदारी सांभाळली आहे.
येत्या १६ नोव्हेंबरला देवी सातेरी प्रॉडक्शनची निर्मिती असलेला हा 'एक सांगायचंय.... UNSAID HARMONY’ हा सिनेमा संपूर्ण महाराष्ट्रात प्रदर्शित होणार आहे.
