राष्ट्रीय पुरस्कार प्राप्त अभिनेत्री रिंकु राजगुरूची प्रमुख भूमिका असलेला 'कागर' हा बहुचर्चित सिनेमा १४ फेब्रुवारीला प्रेक्षकांच्या भेटीला येतोय. व्हॅलेंटाईन डेच्या मुहुर्तावर हा सिनेमा प्रेमाचा उत्सव साजरा करणार आहे.
सुधीर कोलते आणि विकास हांडे यांच्या 'उदाहरणार्थ' या संस्थेने सिनेमाची निर्मिती केली आहे. राष्ट्रीय पुरस्कारप्राप्त मकरंद माने यांनी कागरचं दिग्दर्शन केलं आहे. वडील-मुलाच्या नात्यावर आधारित रिंगण आणि चार शाळकरी मुलांची गोष्ट असलेला यंग्राड हे दोन सिनेमा मकरंदनं या पूर्वी दिग्दर्शित केले होते. रिंगण आणि यंग्राड हे दोन्ही सिनेमा भिन्न पद्धतीचे होते. त्यामुळे आता कागर या चित्रपटाविषयी नावापासूनच उत्सुकता निर्माण झाली आहे. मूळचे अकलूजचे असलेले आणि राष्ट्रीय पुरस्कार मिळवलेले मकरंद आणि रिंकु या सिनेमातून पहिल्यांदाच एकत्र काम करत आहेत.
कागरचं पोस्टरही वैशिष्ट्यपूर्ण आहे. एका पडद्याआड उभी असलेली रिंकु या पोस्टरमध्ये पहायला मिळते. पोस्टरमध्ये पडदा त्यावर आजूबाजूला असलेल्या वेलींची गराडा अन त्यात रिंकूच्या असलेला दिसण्यातला साज अन नजरेतील करारीपणा एक्स्प्रेशन विलक्षण आहेत. मात्र त्यामुळे कथानकाचा काहीच अंदाज बांधता येत नाही. या पोस्टरमुळे सिनेमाचं कथानक आणि रिंकुसह असलेल्या स्टारकास्टविषयी उत्सुकता नक्कीच वाढली आहे.
'कागरची व्याख्या अधिक स्पष्ट करायला, १४ फेब्रुवारीला व्हॅलेंटाईन अजून फुलवायला, एकमेकांमधलं नातं घट्ट करायला आणि नजरेतल्या भावना अलगद अनुभवण्यासाठी आम्ही 'कागर' घेऊन येत आहोत,' असं मकरंदनं सांगितलं.
