नाना पाटेकर-तनुश्री दत्ता प्रकरणाला आता हळूहळू वेग प्राप्त होत आहे. बुधवारी तनुश्री दत्ताने याप्रकरणी ओशिवरा पोलिस ठाण्यात आपला जबाब नोंदविल्यानंतर तिच्या जबाबनुसार अभिनेत्री डेझी शाहचं नाव समोर आलं असून पोलिस लवकरच डेजी शाहचीसुध्दा या प्रकरणात चौकशी करणार असल्याची माहिती मिळतेय. 2008 साली हॉर्न ओके सिनेमाच्या चित्रिकरणादरम्यान  हे प्रकरण घडलं तेव्हा कोरियोग्राफर गणेश आचार्य यांच्यासोबत डेझी शाह सहाय्यक कोरियोग्राफर म्हणून काम करत होती. नाना पाटेकर प्रकरणाबद्दल तनुश्री दत्ताने सर्वप्रथम डेझी शाहलाच सांगितले होते.

मुंबई पोलिस याप्रकरणी कसून चौकशी करुन लवकरच या प्रकरणात योग्य ती कारवाई करणार आहेत.

काय आहे डेझी शाहचं कनेक्शन 

2008 साली हॉर्न ओके सिनेमाच्या चित्रिकरणादरम्यान कोरियोग्राफर गणेश आचार्य यांची सहाय्यक  आणि आत्ताची अभिनेत्री डेझी शाह त्या घटनेवेळेस तेथेच तनुश्रीला स्टेप्स देत होती. नाना आपल्यासोबत डान्स दरम्यान असभ्य वर्तन करत असल्याची सर्वप्रथम कल्पना तनुश्रीने डेझीला दिली होती. मग डेझीने ही माहिती गणेश आचार्य यांना देऊनसुध्दा त्यांनी या प्रकरणाकडे जाणिवपूर्वक दुर्लक्ष केल्याचं तनुश्रीने म्हटलं आहे.

तनुश्रीने पोलिसांना दिलेल्या साक्षीदारांच्या यादीत डेझी शाहचं नाव सर्वप्रथम आहे.