तबरेज नुरानी दिग्दर्शित मानवी तस्करीसारखं धगधगतं वास्तव मांडणारा 'लव सोनिया' हा सिनेमा लवकरच प्रेक्षकांच्या भेटीला येतोय. या आंतरराष्ट्रीय पातळीवरील सिनेमात अभिनेत्री सई ताम्हणकर महत्त्वपूर्ण भूमिकेत झळकते आहे. 'लव सोनिया' सिनेमाचं स्पेशल स्क्रिनींग नुकतंच पार पडलं. अनेक दिग्गज बॉलिवूडकरांनी या स्क्रिनींगला आवर्जून हजेरी लावली. विशेष म्हणजे कतरिना या स्क्रिनींगवेळी हजर होती. कॅटला हा सिनेमा प्रचंड भावला आणि तिने सईच्या सिनेमातील भूमिकेसाठी दिलखुलास कौतुक केलं.
आपल्या प्रत्येक भूमिकेसोबत समरसून जाऊन सिनेमाला योग्य न्याय देणा-या सई ताम्हणकरने आपल्या या नव्या सिनेमासाठीही भरपूर मेहनत घेतली आहे.लव सोनिया सिनेमातली अंजली वेश्याव्यवसायातली दलाल असते. अशा स्त्रीची भूमिका करताना सईला खूप तयारी करावी लागली. तिने या भूमिकेसाठी चक्क 10 किलो वजन वाढवलं होतं. तसंच वेश्याव्यवसायातली महिलेच्या भूमिकेसाठी तिला त्यांच्या देहबोलीचा बराच अभ्यास करावा लागला.
