'स्माईल प्लीज' सिनेमाच्या सेटवर ललित प्रभाकरची ही धमाल पाहिलीत का?

By  
on  

मराठी सिनेसृष्टीमधला हँडसम, डॅशिंग अभिनेता म्हणून ललित प्रभाकरकडे ओळखले जाते. नेहमीच वैविध्यपूर्ण भूमिका उत्तमरीत्या साकारणारा ललित लवकरच विक्रम फडणीस दिग्दर्शित 'स्माईल प्लीज' या सिनेमात दिसणार आहे.

विक्रम फडणीसने ललितचे काम याआधी पहिले होते आणि तेव्हाच असे ठरवले होते, की माझ्या पुढच्या चित्रपटात ललित असणार आणि विक्रम फडणीस यांनी त्यांचा शब्द पाळला. आयुष्याकडे सकारात्मक दृष्टिकोनातून बघणारा, प्रत्येक क्षणाचा आनंद लुटणारा आणि व्यवसायाने ग्राफिक डिझायनर असणाऱ्या तरुणाची भूमिका ललित 'स्माईल प्लीज' या सिनेमात साकारत आहे.

'आनंदी गोपाळ' या सिनेमामध्ये साकारलेल्या  कणखर, कडक, शिस्तप्रिय अशा गोपाळरावांच्या भूमिकेच्या एकदम विरुद्ध अशी भूमिका ललित 'स्माईल प्लीज' या चित्रपटात साकारत आहे. या निमित्ताने ललितला तो खऱ्या आयुष्यात जसा आहे, तशीच भूमिका साकारण्याची संधी मिळाली. चित्रीकरणादरम्यान ललित सिनेमाच्या सेटवर खूप धमाल, मजा, मस्ती करायचा.

त्यातलाच एक किस्सा म्हणजे 'स्माईल प्लिज' सिनेमात गणपती मिरवणुकीचा एक सीन आहे. सीन संपल्यावर, दिग्दर्शकाने ओके दिल्यानंतर ललित त्या मिरवणुकीत सामील झाला आणि मनसोक्त नाचला. यात तो एकटाच नाचला नाही तर त्याने सेटवरील सहकलाकार, तंत्रज्ञ यांच्यासह सगळ्यांनाच नाचण्यास भाग पाडले आणि सेटवरील संपूर्ण वातावरणच बदलून गेले.

त्यामुळे सगळ्यांचाच उत्साह द्विगुणित होऊन सर्वजण नव्या जोमाने परत कामाला लागले. एव्हरेस्ट एंटरटेनमेंट प्रस्तुत, सनशाईन स्टुडिओच्या सहयोगाने, हॅशटॅग फिल्म स्टुडिओ आणि क्रित्यावत प्रॉडक्शन निर्मित 'स्माईल प्लीज' हा चित्रपट १९ जुलै रोजी प्रदर्शित होत आहे.  या चित्रपटात ललित प्रभाकरसोबत मुक्ता बर्वे, प्रसाद ओक, अदिती गोवित्रीकर यांच्या प्रमुख भूमिका आहेत.

Recommended

Loading...
Share