सध्या सिनेमागृहांमध्ये प्रेक्षकांसाठी मराठी चित्रपटांच्या मनोरंजनाची पर्वणी असताना आणखी एक मराठी चित्रपटच प्रदर्शनासाठी सज्ज झालाय. 'लोच्या झाला रे' या चित्रपटाची प्रेक्षकांना उत्सुकता होती. या चित्रपटात अंकुश चौधरी, सिद्धार्थ जाधव, वैदेही परशुरामी आणि सयाजी शिंदे हे कलाकार झळकणार आहे. सुरेश जयराम यांच्या नाटकावर आधारित या चित्रपटाचा टिझर नुकताच प्रदर्शित करण्यात आलाय. यात अंकुश, सिद्धार्थ व वैदेही यांच्यात चाललेला गोंधळ दिसून येत आहे. विजय पाटकर, सयाजी शिंदे व रेशम टीपणीस यांची कॉमेडीही यात पाहायला मिळेल. सगळ्यांचाच हा गोंधळ आणि पळापळ कशासाठी सुरु आहे ? नेमका कोणाच्या आयुष्यात लोच्या झालाय याची उत्रर या चित्रपटातून प्रेक्षकांना मिळतील. येत्या 4 फेब्रुवारी रोजी हा चित्रपट प्रदर्शित होतोय.
'लोच्या झाला रे'चे चित्रीकरण लंडनमध्ये झाले असून टीझरमध्ये अवघ्या लंडनची सफर घडत आहे. सुमारे एक महिना या चित्रपटाचे चित्रीकरण लंडनमध्ये पार पडले. तिथल्या सततच्या बदलत्या हवामानामुळे चित्रीकरणादरम्यान कलाकारांसह इतर टीमलाही विविध समस्यांना सामोरे जावे लागत होते . कधी अवकाळी पाऊस तर कधी कडाक्याची थंडी यामुळे कलाकारांसोबत संपूर्ण टीमला अनेक कसरती कराव्या लागल्या होत्या.
'लोच्या झाला रे’च्या लंडनमधील चित्रीकरणाच्या अनुभवाबाबत दिग्दर्शक पारितोष पेंटर म्हणतात, ‘’मला वैदेही आणि सिद्धार्थचे विशेष कौतुक करावेसे वाटते कारण लंडनमधील कडाक्याची थंडी पाहता, वैदेहीचा भूमिकेला अनुसरून असलेला पेहराव तेथील थंडीला अनुकूल नसल्याने तिला अनेक समस्यांना सामोरे जावे लागले. तरी ब्लॅंकेटचा सहारा घेत तिने संपूर्ण शूटिंग उत्तमरित्या पार पाडले. सिद्धार्थचेही बरेच सीन्स हे शॉर्ट्समध्ये असल्याने त्यालाही थंडीचा सामना करावा लागला. मात्र कोणीही तक्रार केली नाही. या चित्रपटात कलाकारांनी जेवढी मेहनत घेतली आहे तेवढीच मेहनत पडद्या मागील सदस्यांनीही घेतली आहे म्हणूनच आमच्या संपूर्ण टीमने घेतलेली मेहनत यशस्वी होईल व प्रेक्षकवर्ग या चित्रपटाला भरभरून प्रतिसाद देतील, अशी मला अपेक्षा आहे."
.jpg)
'लोच्या झाला रे' या चित्रपटाचे दिग्दर्शन पारितोष पेंटर आणि रवी अधिकारी यांनी केले असून संजय मेमाणे यांनी छायाचित्रणाची धुरा सांभाळली आहे. नवीन चंद्रा, नितीन केणी, पारितोष पेंटर आणि शांताराम मनवे यांनी चित्रपटाची निर्मिती केली आहे तर मंगेश रामचंद्र जगताप कार्यकारी निर्माता आहेत.
