आज बॉलिवुडचा भाईजान सलमान खानचा 53 वा वाढदिवस आहे. सालाबादप्रमाणेच तो आपला यंदाचा वाढदिवसही  मित्रपरिवार आणि कुटुंबियांसोबत पनवेलच्या फार्महाऊसवर साजरा करतोय. इंडस्ट्रीत न्यू कमर्सचा गॉडफादर म्हणून मिरवणा-या या दबंग खानची इंडस्ट्रीत जवळपास 30 वर्षांची कारकिर्द आहे.

सलमान खानचा जन्म मुंबईतच झाला. त्याचे वडील सलीम खान हे बॉलिवुडच्या प्रसिध्द लेखकांपैकी एक. सलमानलासुध्दा वडिलांसारखंच लेखक व्हायचं होतं पण त्याला अभिनयाची संधी मिळाली आणि मग काय त्याने सिनेरसिकांवर जादूच केली.

१९८८ मध्ये 'बीवी हो तो ऐसी' या हिंदी सिनेमाद्वारे भाईजानने सिनेसृष्टीत पहिलं पाऊल टाकलं. सलमानने प्रमुख नायकाची भूमिका साकारलेल्या 'मैने प्यार किया' या १९८९ साली प्रदर्शित झालेल्या हिंदी सिनेमाने बॉक्स ऑफीसवर तुफान कमाई केली व त्या वर्षीचा फिल्मफेअर पुरस्कार त्याला मिळवून दिला.

त्यानंतर 'साजन', 'हम आपके है कौन', 'करण अर्जुन', 'जुडवा', 'प्यार किया तो डरना क्या' आणि 'बीवी नं. १' , 'हम साथ साथ है' या 90 च्या दशकांतील सलमानच्या  सिनेमांनी तरुणांना अक्षरश: वेड लावले. या सिनेमांमधील त्याच्या व्यक्तिरेखेचं नाव प्रेमचं होतं. त्यावर प्रेक्षकांनी मनापासून प्रेम केलंय व तो त्यांचा लाडका बनला.